أهلا بيكم جميعا، حبيت أشارك معاكم حكايتى و حبى مع الخشب و الديكورات.

انا ميشلين وجدي 

الموضوع بدأ معايا بالصدفة لما كان عندى كمية كبيرة من الخشب، و حبيت أجرب أعمل بيهم أشكال حلوة. بدأت أدور كتير على أفكار و أشكال و أجرب أنفذها، الموضوع مكنش سهل خالص فى الأول لإنى كنت بعمل كل حاجة بإيدى

و طبعا قابلنى عقبات كتير جدا فى كل خطوة تقريبا من أول التصميم و الألوان و تقفيل الشكل لحد التغليف، كان أهم حاجة عندى أنى أطلع شكل جذاب و منغير عيوب، بس كنت مستمتعة بكل خطوة بعملها، و كنت بعمل الموضوع فى الأول مش أكتر من هوايه

كل قطعة خشب كنت بشوفها زى كنز مستنى يتعمل منه حاجة جميلة. مع كل تجربة، كنت أتعلم حاجة جديدة و أطور نفسى

لحد ما كل اللى حواليا شافوا شغلى و هما اللى شجعونى كتير عشان أبدأ المشروع ده، و فعلا بقى عندى شغف كبير بالشغلانة دى و كل قطعة بعملها بتفرحنى

دلوقتى حبيت أشارككم الفرحة دى لإن كل قطعة بعملها بتكون من قلبى و بشغف، و بتمنى إنها تضيف لمسة حلوة فى حياتكم زى ما أضافت فى حياتى